أول سبّاح فى التاريخ يعبر المانش من غير رجلين !!

[الصحفي الطائر]

 

أول سبّاح فى التاريخ يعبر المانش من غير رجلين !!

مصطفى خليل اتولد سنة 1958 فى امبابة .. وكان بيلعب فى فريق أشبال الزمالك وتفوق فى كرة القدم بجانب تفوقه الدراسى .. لكن وهو بيعدّى مزلقان ناهيا فى بولاق الدكرور فقد رجليه الاتنين وأحلامه فى انه يكمل لعب كورة ويعيش زى أى طفل طبيعى ..
دخل كلية التجارة وكان بيحلم يكون معيد لكن سقط فى أول سنة .. فقرر يقدم على شغال فى شركة ويعتمد على نفسه .. وبالفعل جنب تفوقه فى شغله اتخرج من كلية التجارة بتفوق ..
سنة 1981 السبّاح المصرى خالد حسان عبر المانش رغم انه فاقد كف رجله .. فوقتها حس مصطفى ا...ن السباحة مش مستحيلة رغم انه فاقد لرجليه وكان بيحلم يكون الشخص التانى اللى يعبر المانش !!
فى الأول رد فعل الناس كان بين اللى شجعوه واللى اشفقوا عليه واللى اتريقوا على اعاقته .. لكنه بدأ يتدرب فى فترة المصايف مع نفسه وبعدها قرر يطلب مدرب سباحة محترف عشان يشارك فى مسابقات .. وكانت المغامرة انه عرض حلمه على كابتن عبدالباقي حسنين أشهر مدربين السباحة وقتها
كلام الكابتن كان صادم لمصطفى لأنه قاله ان السباحة معتمدة بنسبة 75% على الرجلين وانه استحالة يحافظ على اتزانه فى المية من غير رجلين .. لكن مصطفى مقتنعش بالكلام ده ونزل المية من وراه عشان يثبتله العكس !!
وسط صراخ الكابتن وهو ينادى على مسؤولين الانقاذ فى المكان لقى مصطفى بيعوم من غير رجلين وقادر يحافظ على اتزانه كويس ! فغير رأيه ووافق يدربه ويراهن عليه فى مسابقات دولية ..
الكابتن اختار الشخص الصح لأن مصطفى قدر يعبر المانش من غير رجلين .. وبعدها عبر المانش ضد التيار وبعدها كرر عبور المانش مرة تانية .. عشان يكون هو أول لاعب صاحب إعاقة يعبر المانش 3 مرات من ضمنهم مرة ضد التيار .. وأول سبّاح فى التاريخ يعبر المانش من غير رجلين !!